च्यातिएको टोपी र दौरा-
टालेको भोटो र सुरुवाल
लगाएका मान्छेहरू
निस्लोट अँध्यारोमा
लाल बहादुर शास्त्री र होचिमिन्ह खोजी रहेछन्
सल्लोको छेस्को बालेको प्रकाशमा
पेरिसडाँडा‚ बल्खु र सानेपामा
आफ्नो अनुहार उज्यालो देखाउने
ऐना खोजी रहेछन्
- ती मान्छेहरू
एक पटक मुसुक्क हाँस्ने
साइत पर्खि रहेछन् ।
ऐना फुटेको‚
उसले हाँसो पनि फुटेको देखाउँछ
जोडिँदैन फुटेको ऐना
तैपनि जोडिन्छ कि ? -भनेर
पर्खी रहेछन् मान्छेहरू ।
नव लाल बहादुर र नव होचिमिन्हहरु
भारतमा बेथिति उठाइ रहेछन्
अमेरिकासँग साठगाँठ पछिको
मित्रता गरी रहेछन्
तर
सत्य कुरा भन्न
धेरै हिम्मत गर्नु नपर्ने भए
र
कुनै जोखिम ब्यहोर्नु नपर्ने भए
जोसुकैले किटेर भन्ने थिए-
एउटा प्रश्नको जबाफमा
शक्तिमा भाकाहरू “को कसको अवैध सन्तान हुन्” - भनेर ।
