पर्दा लाग्दै छन्
उघ्रदैछन्
लाग्दै, उघ्रँदै गर्दै छन् - पर्दाहरू
नाटक देखाउदैछन्, साहेबहरू
साहेबहरू आउदैछन्
चटक देखाउदैछन्
जादैछन्
हामी
ताली बजाउँदैछौ
साहेबहरू
बाली बजाउँदैछन् ।
ताली बजाउँदा बजाउँदै
हाम्रा त हातहरू खिइ सके
चटक हेर्दा हेर्दा
हाम्रा त अनुहारहरू
मरन्च्याँसे भै सके
तै पनि हामी चटक हेर्दैछौ
बिचारा साहेबहरूलाई
माया गर्दैछौ
हौसला दिदैछौ
चटक
प्रवर्धन गर्दैछौ
हो
आज पनि
साहेबहरू चटक देखाउदैछन्
हामी चटक हेर्दैछौ ।
सम्झन पनि पट्यार लाग्ने समयदेखि
यसरी नै
नाटक हेर्दै
चटक हेर्दै
साहेबहरूका नाटक र चटकमा
ताली बजाउँदै
यसरी नै चलिरहेछ
एउटा यात्रा
निरन्तर चलिरहेछ
चलिरहेछ ।
अनायास
एउटा सूचना आएको छ
साहेबहरूका लागि,
नाटक हेर्न
एउटा हूल आउँदैछ
हूल केटाकेटीको
हूल नानीहरूको
हूल बालकहरूको ।
साहेबहरूले नाटक देखाउँदा
हूलले आँखा चिम्लिने छ
साहेबहरूले चटक देखाउँदा
हूलले
साहेबहरूलाई पनि
चटक देखाउनेछ
बालकहरूको चटकमा
साहेबहरू नाङ्गो हुनेछन्
दौडिने छन् साहेबहरू
गल्ली र चोकतिर
जसरी एउटा राजा
एउटा बालकले नाङ्गो पारेपछि
दौडेथ्यो दरबारतिर ।
२०७१ आषाढ ।
