उनीहरू टोलाएका थिए
घामका किरणहरू हेर्दै थिए
उनीहरूले भने
“हामी घामका किरणहरूमा
रङ् पोत्दै छौं”
हामीले हो भनी दियौं ।
भोलिपल्ट कलिलो घाम
मान्छेका आङमा लाग्यो
न्यानो भयो
उनीहरूले फेरि भने
“हामीले घामका किरणहरूमा
रङ पोतेपछि
“घाम यसरी न्यानो भयो”
“चम्कियो”
त्यसलाई पनि हामीले
हो भनी दियौं ।
फेरि अर्को दिन
उनीहरू आए
र यस पल्ट भने¬—
“हामीले रङ पोतेर
घामका किरणलाई
न्यानु पारेका छौं
सर्वत्र समान रूपमा बाँडेका छौं
रङको खर्च र मजदुरी दिनु पर्छ ।”
मान्छेहरू
छक्क त परेका छन्
तर
गाउँमा अहिले चुनाव आएको छ
थाहा छैन
यस पल्ट
चुनाव जीत्नेले
हावामा पनि रङ् भर्छन् कि ?
हो अहिले
गाउँमा चुनाव आएको छ ।
२०७० असार ।
