युद्ध भए जस्तो पनि भयो
युद्ध भएन जस्तो पनि भयो
त्यसो त बन्दुकहरू पड्किए
गोली चले
मान्छे ढले
रगतको खोलो बग्यो
विधवा र टुहुराको हुल बन्यो
त्यसैले युद्ध भए जस्तै भयो
युद्ध त भयो ।
तर
दागेका गोलीहरू निसानामा परेनन्
ढाल्न खोजेकाहरु ढलेनन्
अरू नै ढले
दुवैले दागेका गोलीका निसानामा
अरू नै परे
विधवा र टुहुराहरूका पती र पिता ढले
एकतातिर हिडेको युद्ध अन्तै पुगे जस्तो भयो
युद्ध त भयो
हो, यस्तै — यस्तै भयो
लाग्छ,
युद्ध त अनाडीहरूले लडेछन्
युद्ध त अनाडीहरूले धानेछन्
अनि त
युद्ध भए जस्तै पनि भयो
युद्ध भएन जस्तै पनि भयो ।
२०७० असार ।
