हुर्केको समयलाई
नियन्त्रणमा राखेको भ्रम पिएर
सुतेकछन् उनिहरु यतिबेला,
संचालन गरिरहेछन् उद्योगहरु — सपनाका
थाहै नपाइ
कहाँबाट उत्पादन गरेछन् ?
थोक थोकमै बाँड्न पुग्ने झुटहरु
यसपाली पनि बाली फलेन
तर भकारीका भकारी झूटहरु वितरण भएको छ
“अनिकाल लाग्दैन अरे”
यो हल्ला पनि
झुटकै भकारीमा भेटिएछ ।
आज फेरि
शहर जाँदैछन् — मान्छेहरु
नत्थुराम गोड्सेको आगमन रहेछ
हरेक वयस्कलाइ उपस्थित हुन उर्दी छ
उस्ले प्रवचन दिनेअरे
“अहिंसा र गान्धीबाद”का बारेमा ।
उत्साहित छन् मान्छेहरु
रमाइरहेछन्
नाचीरहेछन्
लाग्छ—
अब घर फर्के पछि
उनको चूलो आफै बल्नेछ
उनले ठानेकाछन्
गोड्सेका अहिंसा र गान्धिबादका प्रवचनले
अब उनको जीवनमा बत्ति बल्नेछ
खेत र बारीमा
व्याड नराखिकनै
बाली लटरम्म झुल्नेछ ।
२०७० असार ।
