उनीहरूले शपथ लिए
हामीले हेरिरह्यौ‚ सुनिरह्यौ
शपथमा नयाँ पनि थिए
पुराना पनि थिए
शपथ मुलुक र जनता प्रति वफादार हुने थियो
शपथ निष्ठा र विश्वासको थियो
शपथ संविधान प्रति वफादार हुने थियो
शपथ मुलुक र जनताको सोझो चिताउने थियो
शपथ इमानदारीको थियो
मेरो मनमा भने यसै एउटा प्रश्न उठ्यो
“ओ माननीयज्यू ! तपाइले शपथ लिनु भएको कुरा साँच्चै हो ?”
हो भने त ठीक भयो
राम्रो भयो
तर
त्यहाँ हाम्रा गाउँको एउटा भाइ पनि रहेछ
जसले केही भन्नु अगाडी सधैँ − “सत्ते ढाँटेको हैन”− भन्थ्यो
अनि सधैँ ढाँट्थ्यो
अरू पनि रहेछन्
जेलमा बस्नु पर्ने
अलमलमा त्यहाँ पुगेछन्
भ्रष्टाचारको आरोप लागेकाहरु रहेछन्
ठूला – ठूला ठेक्का लिएका
पैसा मात्र लिएर काम नगरेका पनि रहेछन्
दौरा सुरुवाल कोट टोपी लगाएका
मन विदेशीको भएका पनि रहेछन्
पाँच वर्ष फेरि जागिर थपियो भन्दै पुगेका पुराना पनि परेछन् ।
मलाइ अलिक चिन्ता र छटपटी लागेको छ
इमान्दार कोही भए
ती
पुराना र नयाँको माया जागेको छ
फोहोरको पिचकारी हानाहानमा
सेतो वस्त्र पहिरन भएका ओ माननीयहरू !
पाँच वर्षपछि
के तपाइका सेता वस्त्र र शपथको कागज
बेदाग भएको
हामीलाई देखाउन सक्नुहुन्छ ?
